الكرم والحكمة بقصيدة هلال العضيلة

منوعات

4753 مشاهدات 0


الشاعر هلال بن بركة الجبيل العضيلة المطيري. ولد عام 1352هــ تقريباً في صحراء عالية نجد حول بلدة طلال التابعة لمنطقة المدينة المنورة . وفي عام 1397هـ استقرت به الحياة في محافظة الرس .

 اخترنا له هذه القصيدة التي تدل على الكرم والحكمة ، وبعضا من جوانب سيرته و ما قاساه في حياته وتقلبه بين حال البداوة والحضارة ، يقول رحمه الله :

 

وادلتـــي بدّلـتها بـ ام حنـحـون

 ونار العِشـاء بدّلتها بالسـراجي

 

وِقـدة حطبهـا ماشـرينـاه بديـون

ماله ثمن ياكـود قـول النهَـاجي

 

والنـجـر بدلنـا دنيـنـه بطاحون

 

وبدلت محماس المنارة بصـاجي

 

وبدلت نسـناس الـذواري بفـريـون

وبدلت مرقاب الضحى بالحراجي

 

قالـوا تدلل قلت ماهـو بمـن هـون

 أخـاف أصيّـح لـيـن تابـس اوداجي

 

ما ادري يجيـني قـرش والا يـعيـّون

واصــير بيـن المـدّعـي والمـحاجي

 

أطب وأطلع ما اعـرف وش يقولـون

 وان جيت ابشري ماعرف وش خراجي

 

نـاسٍ علـى كل البضايع يصيحـون

 مجمـّعـين الحــاليـة والـهمـاجي

 

وانا ما اعـرف اللي لفعلـه يعرفـون

معـاودين لفـردهـا والكمـــاجي

 

ان جيت ابا أكـذّب ويلا الكذب ملعـون

 ولاهـو رفيــقٍ لي ولا منــه راجي

 

اخترت عنه اللـي له النـاس يرجـون

وطلعـت والمكسـب ماغـير ادّراجي

 

فرخ اليماني حال من دونهـا الشـون

لـو شلتهـا شيـلٍ بليـا مــزاجي

 

ولو احتزم قـالـوا لي النـاس مجنـون

 وأكثر حراهـم يصرفـو لي عـلاجي

 

والقفش الأشقر نشتري عنـه صابـون

والطـير حطينـا بوكـره دجـاجي

 

وأيضا بعـد يطلـب علينا تلفــزون

وان قلـت لا لقـو علي احتجـاجي

 

اشـتر مثل جـيرانا يـوم يشــرون

الحضـر واللي ينـزلـون الـزراجي

 

قلت أشتريـه أتبـع رضاكم وممنـون

وجبـته وجاني بالعجـم والخـواجي

 

من العرب والجـن والأنس مسكـون

ولـه على كل الوجيـه إدّهــاجي

 

دايم اليا سمعـوا بصـوته يعجبـون

وانا ليا شفتــه يجيـني سنـــاجي

 

وبيت الشعـر بعته بصبه ومعجـون

إليـا حكيت أكثـر علي اللجــاجي

 

له رفـةٍ خـطّارهـا مايطقــون

مفتـاحهـا ماهـو بـرقـمٍ وتـاجي

 

مطولـه عمدانهــا يوم يبنــون

والمــوخـرات قصـيّراتٍ عــراجي

 

مفتاحهـا ماهو من السوق مسـنون

مفتاحهـا رد السـلام الهـجــاجي

 

واللي تيسّـر عندنا الربـع يلقـون

 والقـل يحـدا والبخـل مـا ينــاجي

 

والجـود ما هو كل الأيام مضمـون

يـومٍ يغيـب وبعـض الأيـام يـاجي

 

عيـت تطيـع وبعتها بيع مغبـون

عـز الله اني بعـت فلـة حجــاجي

 

حـتى العصا اللي مايجي دونها دون

جت دونهـا السبـحة وراحت مـراجي

 

ماباقي الا البيت والبيت مرهـون

 يارب حسـن الخـاتـمـه يـامنـاجي

 

ولولا الرهن ماهو عن البيع مكنون

يمـديـه مع تـال الرمك فالعجـاجي.

الآن - هلال العضيلة

تعليقات

اكتب تعليقك