حاتم بن مروي الشاطري يكتب:

‏كتبنا القصيد ومالنا من وراه أطماع
هويناه لانه ورث جدي وشايبنا
بذوره مجانيها تبي تعجب الزراع
مدام ارتوت من مزنةٍ من سحايبنا
لياصار ماهو معتلي بي سما الابداع
يبي يصبح الإبداع كله سبايبنا
سلامي على اللي يرتفع ل انزلو فـ القاع
وسلامي على اللي تنعني له ركايبنا
ترى الحق لو طول غيابه ماعمره ضاع
وترى الصدق لو قلناه ماهو بعايبنا
وترى الصبر كشاف المراجل لها كم باع
شف الدين وصانا عليه فـ مصايبنا
واذا صار ما للطيب بيت وذرى وشراع
وش اللي في مجلاس الرياجيل جايبنا
واذا الرجل ماصار اله بين الرجال ذراع
من اللي نبى انحسبه فـي حـزة نوايبنا
يجي من خطا الغالين ضيق وسقم وصداع
ونهوّن على أنفسنا بقولة حبايبنا
مثل مايراعى خاطرك فالمجالس راع
ترانا نبي نشري خواطر  قرايبنا
ولو صار بس الهمّ ب ان لبطون شباع
واذا ماتت الهمه ركزنا نصايبنا
وترى الوقت لو يضحك بضحكه وهم وخداع
ليا مال فينا الوقت ماهو بـ هايبنا
ومادام القلوب انظاف ودام الصدور وساع
عجايب زمنا فـ الحقيقه عجايبنا


حاتم بن مروي الشاطري