لو الاعاقة تنطق !!

بعد الترحيب الحار اللى احر من جونا هاليومين ابوخمسين وساعة التحكم مجذبتنا يطيب لى ايها الاخوه او خلونى اقول لكم قبل لايطيب لى انتم فاكرين سالفتنا قبل سنه بالضبط مثل هذى الايام يوم اعتمدنا بالاجماع مقالة مجلس دار مداره سلام فى خدمتكم اللى كنا نقصد فيها المجلس الاعلى للمعاقين اللى لازال بنفس ذات المكان  نفسه والى ماشاء الله .. كانت هذى افتتاحية المعاق لهذا اليوم الساخن حيث اضاف .. الكلام اللى ذكرناه العام هو نفس الكلام اليوم وباجر وبعده فى ظل عدم تقبل الشارع الكويتى للمعاقيين والحقوق اللى له .. قال الشايب وش الجديد اللى عندك كل هذا سمعناه وقراه متابعيين الجرايد ومجلس الامه .. قال الشاب انت لقيتنا ماعندك غير هالسالفة المستهلكة .. قال الرجل اشوفك ساكت رد عليهم .. والله ناطر  الخبير يدلى بدلوه هو الاخر علشان اتكلم .. ياعم ماليش دعوه انتم كوايته وتحلوها بينكم وزى ماتقولوا ناركم تاكل فى خشبكم .. مدامكم جذا انا جايكم بالكلام اللى يسم البدن ويجيبله الموت على طول .. قبل المطالبات بحقوقنا عند خلق الله خلو المجلس الاعلى ينزل من برجه العالى اللى بمقره الرئيسى علشان نقدر ندخلة .. قال الشاب استعين بصديق وادخله .. حلوه هذى عمرك اطول من عمرى سويتها بعد ما وعدت واحد من العمال بالقريشات انه يساعدنى المهم شيل وحط ويمينك ويسارك دخلت ودفعت الاتعاب لهالعامل هاب الريح وياليتنى مادخلت .. قال الشايب خير انشاالله .. اهلا عبد المجيد هو منين يجى الخير عند هالناس اللى موجودين بالبرج العاجى ماتسأل واحد منهم كان رجل او ست على طول يجيك الرد بزعل وغضب ماركة افتح قوس الله لايهينك ياعم سيف إذا مو عاجبك اشرب من البحر اللى نشوفه من درايشهم سكر القوس .. افا لهالدرجة قالها الرجل .. واكثر تدرون اشلون سيبونى اعيط قدمت الطلب قالولى استريح دورت كرسى الاستراحة لقيته بجنب المصد استعنت على الشقا ربنا وجلست بمكان ضيق بجو حار يتقاطر معه عرقى لدرجة ان الواحد يتمنى يكون لابس اى شى من ماركة تيفال علشان مايلصق عدوها .. الامر اللى خلانى اشرب باقى بطل الصحه اللى جايبه معى شوى حسيت بشى تحشحش بأحشائى اعجلنى سألت الموظفه وين اعزك الله دورة الامواااه قالت بالشقه الثانيه ونفس السؤال رددته قالوا انزل الدور اللى حدرنا ونفس اللى حصل فوق حصلى بكل الادوار لين وصلت للارضى سألت الحارس دورة المياه فين ياعم .. قال والله مافيش إلا وحده ومفيهاش ميه عندها نزلت دمعتى على خدى مخلفه وراها دبايه احسن من اسفلت شوارع الكويت اللى بنشرت بتاير سيارتى .. قال الشايب ياعيباه بجيت .. اى والله  من وجع الحسره اللى طلعت عرق على جبهتى قلت بعقل بالى اعيد الكره وادخل هالدايره من جديد واشوف اى واحد واترجاه لعل وعسى يترحم العكاز اللى بيدى ومن حسن حظى دخلت على وحده منقبه وقالت بكل بساطه الباب اللى بجنبك ادخله دخلته وفكيت المسائل اللى كانت عافستنى  وانا ادعى لها بطولت العمر والستر لموقفها البطولى .. قال الخبير يااااااه للدرجة دى .. واكثر وهالحين واشرايكم بهالمبنى واهله اللى ماقدرونا وحنا معاقيين لا ويقولون حاطينهم بخدمتنا لا ونسيت لااقولكم حتى عمالهم اقشر منهم الواحد منهم يزقرك على راى اهل الامارات وماتقدر تقول له شى لانك محتاجهم والله يمسيك بالخير يافواز ياجملى وين ألقاك بهالمبنى العويص .. قال الخبير الحمدلله على الصحه وافرح يافلبى وتعيش وتاخذ غيرها يامعاق .. قال الشايب إلا هذولا يبيلهم تغير واستبدالهم حالهم حال مبناهم اللى تقول عليه إذا هالناس مابقلبها رحم لكم ليه مخلينهم .. ايه ياعم الحج انت ناسى ان دى وظيفة زى كل الوظائف الناس عايشه منها وهما مالهم ومالنا المهم الواحد منهم يقبض المعلوم  وادى دقنى إذا عاش الى اخر الشهر ويتفلقوا المعاقيين هما عيالنا .. وفى هذى الاثناء رفع على مسامعنا الشيخ زغلول اذان الظهر .
* اخر رشفة فنجان : نبارك لكل من فاز بأنتخابات مجلس الامه .. وخيرها بغيرها للى ماحالفهم الحظ والجايات اكثر .. ومن باب الذكرى اذكر الناجحين بمناقشة قانون المعاقين رقم 49/96  اللى بالادراج منذ مبطى ياليتهم ينفضون الغبار عنه ويتطبق وبالمره ياليت الحكومة تحثم على قانونا .

محمد خلف الشمري
[email protected]