رجا القحطاني: وينك صلاح الدين؟!

ياصلاح الدين وينك وين رحتْ
مجدك  العملاق   فينا  لايزالْ

اغتبقت ايام عزك واصطبحتْ
من سواك الرمز  فينا  والمثالْ

قدوتك نهج النبي منها نجحتْ
توسعك تقواك لوضاق المجالْ

فزت في صعب المهمات وربحتْ
راية   الإسلام   عانقها   الكمالْ

ردت المقدس على يدْك وفلحتْ
وافلحت وانهار حصن الاحتلالْ

الصليبيين   ضاقوا   وانشرحتْ
حلو طعم النصر في مر القتالْ

ماانصلح حال العرب لين انصلحتْ
في   سبيل  الله  وهمات  الرجالْ

كم وفيت وكم عفيت وكم فتحتْ
من مدينه فتحها صعب المنالْ

مخلص للدين والإخلاص بحتْ
ماطلبت اهداف شخصية محالْ

ادري انك لو تطالعنا انجرحتْ
مثل   حرٍّ   مايطيق   الامتثالْ

انظر امتنا نحتها الضعف نحتْ
يا  صلاح   الدين  شئ   مايقالْ

فوق فوق أول وصارت تحت تحتْ
من   علو البذل  لادنى  الابتذالْ

لو سمحت ارفق عليها لو سمحتْ
لا   تلعنها   على  كثر   الضلالْ

ألف شاعر صاح ف اذنيها وصحتْ
وألف مصلح شد ف ايديها وقالْ

توجعك منها الظروف اللي لمحتْ
كيف لو درت النظر ثرت انفعالْ

ماتلام تروح غاضب وان صفحتْ
ربما   مع  كل   قائد وسع   بالْ

مت في  عز  المعزه  واسترحتْ
ماتعيش اللي نعيش أزمة نضالْ

مايساعدني التمني وان شطحتْ
قلت  ليت  ترد  ونردد :   تعالْ!!

__________________

الشاعر رجا القحطاني