المخيال يحث ابنه على طلب العلم

هذي قصيده كتبتها لولدي عبدالله فيها نصيحه وتشجيع على الدراسه وطلب العلم:

يا عبيد أنا يابوك أرأف بحالك
ودي لك العليا على روس الأزوال
وصيتي يابوك دايم قبالك
خذها وتلقى في حياتك لك ظلال
أول تراهم ينشدونك خوالك
واليوم لا والله تبدل بنا الحال
شهادتك والعلم هي راس مالك
تجعل ما بين الناس لك قدر وإجلال
أحرص على درسك ويطيب فالك
الدرس للي مثلكم راس الأموال
أتعب عليها وأجتهد في مجالك
شهادتك تصير لك عمن وخال
كم واحدن ماهوب يسوى نعالك
علمه يحطه اليوم في راس منزال
لا يسبقك يابوك وكرّب حبالك
العمر يجري واغنمه بطيب الأفعال
إن طحت علمك خير من يرتكالك
في فزعته يسوى ثمانين رجال
كم واحدن يكرهك شوفه صفالك
يدرالك الخاطر ويسعالك وصال
إن رحت كلن يحتريلك وصالك
وإن جيت تبشر لك بدلّه وفنجال
في منصبك كم واحدن لا عنالك
يدعيك يابو فلان ويستاسع البال
شهادتك يابوك تستر خمالك
وتصير غلطاتك خفيفات الأحمال
الربع تكثر في يمين وشمالك
ومن دونك يصدون عيلات الأنذال
ادرس مدام الوقت جاد وعطالك
العلم يبني بيت وقصور وأموال
أخذ النصيحه من محبن دعالك
ياما دعالك وأنت نايم ولا زال
ورّث كلامي عقب عيني عيالك
وأنصح عيالك ينقلونه للأجيال

حمد المخيال