حمد المخيال بحملة ناطر بيت:

في هالوطن مال البشر أي قيمه

راحت حياته في رجا ينتظر بيت

أشرف لنا نعيش عيشة بهيمه

جاخور يسترنا ولا الذل ياكويت

لـ أهل الشقق بات المواطن وليمه

تناتفوا ريشه ومعاشه حتاحيت

غرفه وصاله يا حيات الظليمه

فيها نعيش وكننا في توابيت

ياسيدي ماعاد نطري العزيمه

مانكرم الظيفان ولا عندنا صيت

أكرم من الشعب الكويتي حريمه

ديوانهم مفتوح وإن قلت كفيت

تاجر ويسكن في قصورٍ عظيمه

وأنا يجيني الببت لامن توفيت

ورث اليتيم وورث بنتٍ يتيمه

في ذمة الإسكان وشلة سرابيت

صرنا لهم ياشيخ ضمن الغنيمه

هذي حقيقة وضعنا ما تبليت

يرضيك طفل يعيش حاله سقيمه

ومابين عزاب العماير لهم بيت

الحال متبهذل وربي عليمه

نص الشعب عايش وهو للأسف ميت

حمد المخيال