أحمد الميموني للحكومة.. اعتبرونا دولة صديقة!!

اعتبرونا... دولة صديقة

كتب أحمد الميموني

ماطلبنا شي ترى من حقنا فلوسنا رايحه هبات للدول وللمنظمات.. طيب عطونا شوية، هل يعقل اغنى بلد بالعالم و 80% من الشعب مديون وبخطأ من البنوك، اذا فيكم خير حاسبوهم بس مادام ماتقدرون عطوا الناس وريحوهم، خلصونا من هالموضوع يابشر ترى هذي فلوسنا . لوجمعتوا الهبات والرشاوى والايداعات والتحويلات لعيشنا الشعب الكويتي مرتاحا واعتبرونا دولة صديقة.

***

كل ماتذكرت مسرحية حامي الديار وكلمة الاستاذ سعد الفرج لما قال ( قويه قويه بس مالتك اقوى)  تذكرت التهم اللي ترمى على الشباب جزافا وآخرها في حق الدكتور الفاضل واستاذ الاجيال الدكتور عبيد الوسمي هذا والقنوات العالمية مصورته وهو يسحل ويضرب والجماعة بالداخلية رافعين عليه قضية تعدي بالضرب، لا عاد واسعة شوي . خمسة من القوات الخاصة ياكلون بقره بروحهم الدكتور عبيد يطقهم هذا غرندايزر مو عبيد، انا من بعد ماتقدمت الداخلية ببلاغ ضد بنات بأنهم طقوهم ماعاد اقدر اشره عليكم يرحم والديكم بطلوا جذب شويه . وصدق الدكتور عبيد (وزارة قتلت مواطنا وكذبت بالتقرير وصدر بيان كاذب على لسان وزيرها ماذا تتوقع منها).

***

بما لايدع مجال للشك فالحكومة تتجه لرفع كتاب عدم تعاون مع مجلس ربع الأمة وليس لأن هذا المجلس له اظافر ويشمخ (بسم الله عليه) ولكن من الواضح لدى مستشارين الحكومة ان حكم المحكمة الدستورية لن يكون في صالح الصوت الواحد فحل مجلس ربع الأمة يبطل الدعاوى المرفوعة على الصوت الواحد والطعون بالدوائر فالحكومة تتحايل على الشعب بالالتفاف على احكام القضاء.

***

مبروك الف مبروك عودة قناة عالم اليوم والله اننا مشتاقين لقناة الشعب والف مبروك لكل الزملاء.