محمد خلف الشمري يبحث عن البحر

بلاغ عن تغيب بحر بحر.. بحر.. منهو بحر هذا? على ما أعتقد اني سمعت بهالاسم من قبل .. بحر بحر ايه يا استاذ اللي جاي تقول عليه? المدعو بحر هذا ماله وجود في واقعنا ولا دنيانا .. يعني بس بحر بالخرايط والافلام.. ولمعلوماتكم شخصيا ما عندي ادنى فكرة عن طعمه صج .. هو حلو واللا مالح مثل ما محطة الدوحة تكرر? .. بحر بحر ايه اللي نسمع عنه وما نشوفه إلا بالافلام او إذا نزلنا للجهراء من المطلاع .. يخزي العين شو كبير .. بحر بحر ايه اللي ما نعرف عنه الا اسمه .. لا والمصيبة انه يحدنا من جهة الشرق جغرافيا .. وعلى فكرة البحر هذا من وجهة نظري مثل الاسطورة اللي مالها وجود على هذه البسيطة .. بالنسبة لنا حنا ياجماعة اصحاب الدخل المقرود (المحدود).. بعد زخف الصحراء عليه عفوا زحف خلق الله المقتدرة (اللهم لا حسد) وقسمته امتار وحوط لناس وناس.. يعني اللي عنده ياخذ.. واللي ماعندوش مايلزموش يشوفله نادي صحي مع اخوانه المكرشين ويداحم ابطال الكورسان قصدي اهل العضلات .. ويبلبط ب 4X4 اوفرله .. بحر ايه يا استاذ هالبحر كنا ناسينه.. وما على بالنا الا بحر القوافي مال شاعر المليون اللي مطلعين فلوسه من مخابينا.. اللهم انا صابرون وعليك متوكلون.. بحر ايه يا اساتذة هو لو لنا قيمة كمواطنين بهالبلد جان عملوا حسابنا بكم متر (شفتوا ماحنا طماعين).. بس شنقول حنا يادوبك كمالة عدد والسلام.. انتم معاي واللا قلبتوا الصفحة .. على فكرة قبل الختام.. وقبل ما ارسل المقالة بالايميل ..هوب هوب جني شفت لوحة باحد مناطقنا الخارجية مكتوب فيها م م م اللوحة واكلها البرومة مصدية بس راح افك شفرتها بعون من الله كرمال عيونكم الحلوة المتابعة للعبدلله .. مممنوع السباحة بهذا المكان لان المكان مليان (...) اجلكم الله .. لا حول ولا قوة الا بالله مصب مجاري حسبنا الله ونعم الوكيل ضاقت عليهم .. يعني المكان اللي ما يبونه واللي على دربنا حرمونا منه وخلوه مجمع قضاء حاجتنا.. وهالحين عندكم شك بعنوان المقالة ان بحرنا مسجل عليه حالة تغيب .. هاه صدقتوني انه بحر على الخريطة ويحدنا من ناحية الشرق وبس? محمد خلف الشمري