نواف الفزيع لعلي الراشد: ازعل على المكلسن، لا تزعل على الدلة

وين الدله يا ولد! كتب:المحامي نواف سليمان الفزيع النائب علي الراشد زعلان على كلام النائب سعدون حماد في اتهامه له بانه صاحب شركة الدله، والغضبة المضرية »كما يسموها العرب« من بوفيصل »علي الراشد« كنت اتمنى ان يكون لنا منها نصيب في قضية الفحم المكلسن، فاذا كنت زعلان على العتيبي لانك لا تملك شركات وقدمت شهادة بذلك، منت زعلان على زملائك ملاك الشركات، ومنت زعلان على كلام احمد السعدون الذي قال فيه ان المكلسن حرمنة وبالتالي اصحاب المكلسن شيطلعون؟! هذا طبعا مو كلامي، هذا كلام المعزب بوعبدالعزيز، بسيطة.. تذكر مقابلة لك في برنامج 6/6 مع الدكتور اسماعيل الشطي تكلمت فيها عن شركات المخازن وعن ان الشطي لازم يلغي عقدهم، واعتبرته اعتداء على المال العام، تقدر تفسر لنا شلون صرت محامي شركة المخازن بعد هذه المقابلة، وشلون كنت زعلان عليهم وبعدين صرت تمثل احد اطراف الشركة؟ عجيبة هالمخازن الكل يذم فيها والكل محاميها، صراحة انت ورفيجك محامي المخازن ورئيس لجنة حماية الاموال العامة ما عنده سالفة اللي يشك فيكم، بنظري انتم اشرف نواب في مجلس الامة »ولا يهونون الربع!«. 9 نواب ملاك شركات بعقود لهم مع الدولة ما زعلت عليهم يا بوفيصل وما تكلمت عنهم، فاذا كنت مستنكراً فكرة ان يكون العضو من ملاك الشركات، و هددت باستقالتك اذا ثبت ملكيتك لهذه الشركة، هذا معناه ان هذا الموضوع لا يجوز عليك ولا على غيرك، طيب وبما انك فارس من فرسان حماية المال العام في المجلس، اتمنى منك ان تثير هذه القضية بالمجلس وتطلب استقالة كل عضو يملك شركات من مجلس الامة، هذا المجلس اللي يشكل حالة شاذة في عالم الديموقراطية، فهو الوحيد الذي يستمر فيه الاعضاء بمجالس ادارات الشركات وهم على عضويتهم في مجلس الامة »ترى ما صارت بالعالم كله« لا واشرايك ازيدك من الشعر بيت مفروض على كل عضو ومحام ان يقدم ما يفيد تعليق ممارسته للمهنة من جمعية المحامين حتى تنتهي مدة عضويته، ليش راتب المجلس مو مكفيكم؟ كلّش كلّش خلّو القضايا التي توكلون فيها محصورة بس بقضايا الفقراء التطوعية وقضايا الرأي العام السياسية والقضايا المنظورة امام المحكمة الدستورية، واعتبروها زكاة نواب! بيل كلينتون وتوني بلير مو احسن منكم يا مسلمون، عمركم سمعتوا عن محام يمارس المهنة في الغرب وهو عضو برلماني؟! هذي ما تصير الا عندنا، حتى ديك تشيني بعدما اصبح نائب الرئيس الامريكي قدم استقالته من هالبيرتون وقد كان رئيس مجلس الادارة وديك ما قال عن نفسه انظف واحد بامريكا ومشاريعه كلها نظيفة لأ.. قص الحق من نفسه وقدم استقالته هذا موضوع نقدر نسألك عنه يا بوفيصل؟! وتقدر تجاوبنا عليه واتمنى يكون جوابك هو جواب القاضي علي الراشد اللي كنت اعرفه مو العضو علي الراشد.. الموازين تغيرت وصرنا نتعامل مع وطنيتنا بمعايير مزدوجة مرتبطة فيما اذا كانت المعايير اريد ان اطبقها على نفسي وعلى حلفائي السياسيين او اطبقها على غيري وعلى خصومي، الناس ملّت من تناقضات النواب والناس هي اللي وصلتكم لا تنسون هذا. تزعل على من يوجه لك اتهاما، ولا تزعل على بلد ضيعه ربعك ومجلس اصبحت مهنته التشهير باعراض الناس وتوقيع العقود وترسية المناقصات.. هذه هي ديموقراطية العصابة والتي تشرك كل افراد العصابة في ادارة السرقات، كل بحسب دوره واحد يصارخ، واحد يبوق، وواحد يشكل حكومة! ملحوظة: من بعد الفولكس صار البورش.. الله يرحم.. وسلملي عالسلامة.